ბაზრის მიმოხილვა:
პარასკევს აშშ-ს აქციების ბაზარზე ზრდა დაფიქსირდა, თუმცა კვირა მაინც წაგებით დასრულდა. ეს განაპირობა იმის მოლოდინმა, რომ დადებითი ეკონომიკური შედეგების ფონზე ფედერალურმა რეზერვმა შესაძლოა მეტად გაამკაცროს პოლიტიკა. კვირის განმავლობაში Dow Jones 0.8%-ით დაეცა, S&P 500 1.3%-ით შემცირდა, ხოლო Nasdaq Composite-მა 1.9%-იანი ვარდნა განიცადა. ამ კვირას ინვესტორები განსაკუთრებულ ყურადღებას მიაქცევენ აშშ-ს ინფლაციას, რომელიც ოთხშაბათს გამოქვეყნდება.
Apple: Apple-ის აქციები გასულ კვირას 6%-ით დაეცა მას შემდეგ, რაც გავრცელდა ინფორმაცია, რომ ჩინეთის სახელმწიფო მოხელეებს შეიძლება აეკრძალოთ iPhone-ის გამოყენება. აღსანიშნავია, რომ ჩინეთი, ტაივანი და ჰონგ კონგი კომპანიის ბრუნვის 18%-ს შეადგენენ. ეს აკრძალვა ჩინეთში iPhone-ის გაყიდვებს დაახლოებით 5%-ით შეამცირებს, თუმცა კომპანიისთვის მთავარი საფრთხე ძირითადი მომხმარებლების დაკარგვაა. აღსანიშნავია, რომ ჩინეთის მთავრობა ხელს უწყობს ჩინური ტექნოლოგიების პოპულარიზაციას ქვეყნის შიგნით. ამასთანავე, ისეთი ჩინური კომპანიები, როგორებიცაა Huawei, საგრძნობლად აუმჯობესებენ თავიანთი პროდუქციის ხარისხს.
მიუხედავად ამ ყველაფრისა, Apple-ის CEO-მ, ტიმ ქუქმა განაცხადა, რომ ბევრი ჩინელი მომხმარებელი გადადის Android-ის სისტემიანი სმარტფონებიდან iPhone-ზე, რაც ცალსახად დადებითი სიგნალია კომპანიისთვის.
ნავთობის ფასი 9 თვის მაქსიმუმზეა: პარასკევს ნავთობის ფასი თითქმის 1%-ით გაიზარდა და მიაღწია ყველაზე მაღალ ნიშნულს ბოლო ცხრა თვის განმავლობაში. ეს ორი ძირითადი ფაქტორით არის გამოწვეული: პირველი აშშ-ში დიზელის ფასების ზრდაა, ხოლო მეორე ნავთობის შეზღუდული მიწოდება. საუდის არაბეთმა და რუსეთმა ახლახან გადაწყვიტეს კვლავ შეამცირონ ნავთობის წარმოება ჯამში 1.3 მილიონი ბარელით დღეში. Brent ნავთობის ფასი კვირის ბოლოს ბარელზე 90.65 დოლარი იყო, ხოლო აშშ-ს West Texas Intermediate (WTI) ნავთობის კი 87.51 დოლარი. ეს არის Brent-ის ყველაზე მაღალი ფასი 2022 წლის ნოემბრის შემდეგ, ხოლო WTI-ს სექტემბრის შემდეგ. ბაზრის განწყობაზე, პირველ რიგში, გავლენა იქონია მიწოდებასთან დაკავშირებულმა ფაქტორებმა, რადგან მოვაჭრეები ვარაუდობენ, რომ ნავთობის ექსპორტიორი ქვეყნების ორგანიზაცია (OPEC) და მისი მოკავშირეები, ისევე როგორც რუსეთი, შეინარჩუნებენ ნავთობის ფასებს მომავალ ზამთრშიც. მეორეს მხრივ, კვლავ არსებობს ვარაუდი, რომ ჩინეთიდან ნავთობზე მოთხოვნა არ გაიზრდება, რადგან ქვეყნის პოსტ-პანდემიური ზრდა ანალიტიკოსების მოლოდინზე დაბალია. გარდა ამისა, ბაზარი ყურადღებით ადევნებს თვალს აშშ-სა და ევროპის ცენტრალური ბანკების გადაწყვეტილებებს საპროცენტო განაკვეთების ზრდასთან დაკავშირებით, რადგან ასეთმა ქმედებებმა შეიძლება გავლენა მოახდინოს ეკონომიკურ ზრდაზე და შესაბამისად ნავთობის მოთხოვნაზეც.
ნავთობის ფასების ზრდამ დადებითად იმოქმედა ენერგეტიკის სექტორის მარაგებზე. კვირის განმავლობაში Exxon Mobil Corp-ის აქციები გაიზარდა 3.0%-ით, Chevron Corporation-ი გაიზარდა 2.8%-ით, ხოლო Energy Select Sector SPDR Fund (Ticker: XLE), რომელიც მოიცავს ენერგეტიკულ სექტორს, 2.4%-ით გაძვირდა.
Warner Bros. Discovery: Warner Bros. Discovery ამზადებს ანგარიშს მწერლებისა და მსახიობების მიმდინარე გაფიცვის შედეგებზე, რომელიც უკვე 100 დღეზე მეტ ხანს გრძელდება და შესაძლოა წლის ბოლომდეც არ შეწყდეს. კომპანიამ შეცვალა თავისი ფინანსური მოლოდინები და ვარაუდობს, რომ გაფიცვები შეამცირებს მის შემოსავალს 300-500 მილიონი დოლარით. ეს ნიშნავს, რომ კორექტირებული შემოსავალი წელიწადში 10.5-დან 11 მილიარდ დოლარამდე იქნება. Warner Bros. Discovery, რომელიც ფლობს კინოსა და სატელევიზიო სტუდიებს და ბევრ ფასიან სატელევიზიო ქსელს, იმედოვნებს, რომ გაფიცვები მალე დასრულდება, მაგრამ ვერ პროგნოზირებს ზუსტ დროს. გაფიცვები ასევე შეეხო ზოგიერთი ფილმის გამოსვლის თარიღსაც. მიუხედავად ამ გამოწვევებისა, კომპანიამ თავისუფალი ფულადი ნაკადების მოლოდინი მინიმუმ 5 მილიარდ დოლარამდე გაზარდა, ნაწილობრივ ფილმი "ბარბის" წარმატების გამო. WBD კვირის განმავლობაში 11%-ზე მეტით დაეცა.
The United States Oil Fund (USO) არის ETF, რომელიც მიჰყვება ნავთობის ფასს. ეს ETF ინვესტორებს საშუალებას აძლევს მარტივად გააკეთონ ინვესტიცია ნავთობის ბაზარზე ისე, რომ პირდაპირ არ იყიდონ ნავთობის ფიუჩერს კონტრაქტები ან ფიზიკური აქტივები. USO ძირითადად ინვესტიციას აკეთებს მოკლე-ვადიან ფიუჩერს კონტრაქტებში.
